kuchh hain manzar haal ke kuchh ḳhvab mustaqbil ke hain
ye tamanna aankh ki hai vo taqaze dil ke hain
ham ne ye nairangiyan bhi dahr ki dekhin ki log
dost hain maqtul ke aur ham-nava qatil ke hain
umr saari raah ke patthar haTate kaT ga.i
zaḳhm mere haath men ik sa.i-e-la-hasil ke hain
ik dhanak lahra rahi hai ansuon ke darmiyan
meri a.ankhon men abhi tak rang us mahfil ke hain
is se aage kaun jaa.e dasht-e-na-malum men
ham na kahte the ki saare ham-safar manzil ke hain
in ko tufanon se kya matlab bhanvar se kya gharaz
dost jitne hain tamasha.i faqat sahil ke hain
tu jise apna samajhta hai vo mal-e-ghair hai
tere hathon men jo sikke hain kisi saa.il ke hain
janchti hai ghair ko har lahza chashm-e-aib-ju
naqsh mujh men jitne hain saare kisi kamil ke hain
Leave a Reply