mehr-o-mah-o-anjum ka kuchh nishan nahin milta
uḌ raha huun barson se asman nahin milta
raushni ka imkan bhi ab yahan nahin milta
ikka-dukka jugnu bhi zau-fishan nahin milta
tan pe saaya karne ko sa.eban to milta hai
ruuh ke sulane ko ashiyan nahin milta
dil ki raushni le kar dilbar-e-azal ko main
DhunDhta huun muddat se aur nishan nahin milta
mere dil ki dhaḌkan hi garche us ka maskan hai
DhunDhta huun jab dil men kuchh nishan nahin milta
aarzu men phulon ki phir raha huun sahra men
ret ke musafir ko gulsitan nahin milta
chur-chur rahta hai har dam aa.ina dil ka
bevafa zamane men mehrban nahin milta
milta-julta rahta hai na-murad duniya se
apne jan-nisaron se bad-guman nahin milta
us ka milna-julna hai ghayat-o-gharaz le kar
banda-e-gharaz hai vo ra.egan nahin milta
bastiyon ke daman men Dher hain makanon ke
muztarib tamanna ko la-makan nahin milta
bastiyon ke parbat hain qafile hain logon ke
aadmi koi in men jan-e-jan nahin milta
aadmi ki kasrat se aadmi pareshan hai
aadmi ka is par bhi kuchh nishan nahin milta
jis ke paas yakja hon din-o-danish-o-daulat
aise mard-e-kamil ka astan nahin milta
dafn ho ga.e kitne aish ki tamanna men
aish agar mila bhi to javedan nahin milta
sach hai dasht-e-imkan hai ek dhundla naqsh-e-pa
naqsh jis se rahrav ka kuchh nishan nahin milta
ilm-o-fan ke parvano ye bhi kya qayamat hai
‘raz’ ko yahan koi raz-dan nahin milta
Leave a Reply