Karamat Ali Karamat
ham ne jab dard bhari apni kahani likkhi
log kahne lage rudad purani likkhi
main ne ik peḌ samundar ke jazire se liya
aur chaTTan pe paani ki ravani likkhi
ajnabi tarz liye main nahin aaya huun yahan
dastan apni tumhari hi zabani likkhi
chashm-e-mahbub ko nargis ka laqab tu ne diya
main ne sheron men magar ”rat ki rani” likkhi
kaun sa vaqt amal ka hai javani ke siva?
niind kab aati hai? puchha to javani likkhi
raat jab aa.i to din bhar ka fasana likkha
jab chali bad-e-sahar shaam suhani likkhi
bagh-e-firdaus ki lori main sunata kaise?
miri qismat men thi ashufta-bayani likkhi
ḳhushk tha mera qalam kuchh nahin likh paata tha
likhne baiTha to baḌi raam kahani likkhi
tum ne jab harf ko ḳhvabon ka safar kah Daala
main ne bhi lafz ki ta.abir-e-ma.ani likkhi
narm-o-nazuk tha ‘karamat’ tire sheron ka mizaj
vaqt paḌne pe magar sho.ala-bayani likkhi
Leave a Reply