Mere School

Munawwar Rana

mere schōl miri yadon ke paikar sun le

main tire vaste rota huun barabar sun le

tere ustadon ne mehnat se padhaya hai mujhe

teri benchon ne hi insan banaya hai mujhe

na-tarashida sa hiira tha tarasha tu ne

zehn-e-tarik ko bakhsha hai ujala tu ne

ilm ki jhiil ka tairak banaya hai mujhe

khauf ko chhin ke bebak banaya hai mujhe

tujh se shafqat bhi mili tujh se mohabbat bhi mili

daulat-e-ilm mili mujh ko sharafat bhi mili

shafqaten aisi mili hain mujhe ustadon ki

parvarish karta ho jaise koi shahzadon ki

teri chahat men main is darja bhi kho jaata tha

teri benchon pe hi kuchh der ko so jaata tha