Gautam Rajrishi
hain jitni parten yahan asman men shamil
sabhi huiin miri had ki uḌaan men shamil
baḌha hai shahr men rutba zara hamara bhi
hue hain jaise ham un ke bayan men shamil
uchhal yuun hi nahin baḌh ga.i hai lahron ki
nadi ka zor bhi hai kuchh Dhalan men shamil
dhuan ghubar parinde tapish ghuTan ḳhushbu
hain bojh kitne hava ki thakan men shamil
thiin qist jitni bhi ḳhvabon ki be-hisab paḌi
kiya hai niind ne sab ko lagan men shamil
suna hai naam se tere hain bikte afsane
mujhe bhi kar le kabhi dastan men shamil
zara si dosti ki ham se qafiyon ne kiya
kiya ghazal ne hamen ḳhandan men shamil
Leave a Reply