Rashmi Saba
muddaton ḳhuub azmati hai
phir mohabbat samajh men aati hai
ruup apna ujalne ke liye
zindagi dhuup men nahati hai
sab charaghon ko Das chuki andhi
ek din ḳhud se haar jaati hai
saara aalam duha.i deta hai
raat jab dastan sunati hai
koi mayusiyon ko samjha.e
chaah ḳhud rasta banati hai
koi an-ban hui hai gulshan se
kyuun ‘saba’ lauT lauT jaati hai
Leave a Reply