ruKH Pe Ahbab Ke Phir Rang-E-Musarrat Aae

ruḳh pe ahbāb ke phir rañg-e-musarrat aa.e

phir mirī samt koī sañg-e-malāmat aa.e

terī rahmat kā bharam TuuT rahā hai shāyad

aaj āñkhoñ meñ mirī ashk-e-nadāmat aa.e

vaqt shāhid hai ki har daur meñ iisā kī tarah

ham salīboñ pe liye apnī sadāqat aa.e

husn hai un meñ tirā mere junūñ kā andāz

phuul bhī le ke ajab shakl o shabāhat aa.e

daur-e-ishrat ne sañvāre haiñ ġhazal ke gesū

fikr ke pahlū magar ġham kī badaulat aa.e

Leave a Comment