Fatima Hasan
jin ḳhvahishon ko dekhti rahti thi ḳhvab men
ab likh rahi huun un ko haqiqat ke baab men
ik jhiil ke kinare parindon ke darmiyan
suraj ko hote dekha tha tahlil aab men
ḳhvabon pe iḳhtiyar na yadon pe zor hai
kab zindagi guzari hai apne hisab men
ik haath us ka jaal pe patvar ek men
aur Dubta vajud mira sail-e-ab men
purva.i chal ke aur bhi vahshat baḌha ga.i
halki si aa ga.i thi kami iztirab men
azad hain to baagh ka mausam hi aur hai
ḳhushbu hai tez rang bhi gahra gulab men
apni zamin ki ab-o-hava raas hai mujhe
mere liye kashish nahin koi sarab men
dekho junun men un ke khilaune na toḌna
tum ko raqam karenge ye bachche kitab men
Leave a Reply