ik lamha-e-visal tha vapas na aa saka
vo vaqt ki misal tha vapas na aa saka
har ik ko apna haal sunane se fa.eda
mera jo ham-ḳhayal tha vapas na aa saka
shayad mire firaq men ghar se chala tha vo
zaḳhmon se pa.emal tha vapas na aa saka
shayad hujum-e-sadma-e-furqat ke ghaao se
vo is qadar niDhal tha vapas na aa saka
shayad main us ko dekh ke sab ko bhula hi duun
us ko ye ehtimal tha vapas na aa saka
kitne ḳhayal ruup haqiqat ka pa ga.e
jo markaz-e-ḳhayal tha vapas na aa saka
mujh ko mire vajud se jo kar gaya juda
kaisa vo ba-kamal tha vapas na aa saka
har dam ‘ra.is’ vo to nazar ke hai samne
tera to ye ḳhayal tha vapas na aa saka
Leave a Reply