gulon ki gar inayat ho ga.i to
unhen ham se mohabbat ho ga.i to
hamen kyuun saunpta hai daulat-e-husn
amanat men ḳhayanat ho ga.i to
kisi ki bekasi pe hansne vaale
tiri bhi aisi halat ho ga.i to
mujhe tu mujh se baḌh kar chahta hai
miri ḳhud se adavat ho ga.i to
na lag honThon se cigarette ki tarah tu
agar mujh ko tiri lat ho ga.i to
tu ḳhud ko bad-dua deta hai aksar
ḳhuda ke ghar sama.at ho ga.i to
Leave a Reply