rafta rafta arzuon ka ziyan hone ko hai
darhami kuchh aisi zer-e-asman hone ko hai
pa-shikasta ho ga.e hain ham kaḌakti dhuup men
sham-e-gham ab dekhiye kab aur kahan hone ko hai
be-ruḳhi gar aap ki ai jan-e-jan yuun hi rahi
aḳhirash kar-e-vafa dil par garan hone ko hai
Dar hai dil asuda-e-hirman na ho jaa.e kahin
aag thi raushan jahan vo ḳhak-dan hone ko hai
chashmak-e-barq-o-sharar se raat ankhon men kaTi
sun rahe hain sub.h-e-nau ab zarfishan hone ko hai
kal talak to chal rahi thi dil-jalon ki dastan
aaj un ka zikr zeb-e-dastan hone ko hai
is qadar hai hasrat-e-nakam ka ‘rahi’ ghubar
naqsh-pa-e-arzu bhi be-nishan hone ko hai
Leave a Reply