Pahle to Bahut Gardish-E-Dauran Se laDa Hun

pahle to bahut gardish-e-daurāñ se laḌā huuñ

ab kis kī tamannā hai jo maqtal meñ khaḌā huuñ

go qadr mirī bazm-e-suḳhan meñ nahīñ lekin

hiire kī tarah fan kī añgūThī meñ jaḌā huuñ

ḳhairāt meñ bāñTe the jahāñ maiñ ne sitāre

ḳhud aaj vahīñ kās-e-shab le ke khaḌā huuñ

hotā koī patthar bhī to kaam aatā junūñ ke

TuuTā huā shīsha huuñ sar-e-rāh paḌā huuñ

simTūñ to kisī siip ke siine meñ samā jā.ūñ

ai ‘prem’ jo phailūñ to samundar se baḌā huuñ

Leave a Comment