Shamim Karhani
sharab o sher ke sanche men Dhal ke aa.i hai
ye shaam kis ki gali se nikal ke aa.i hai
samajh raha huun sahar ke fareb-e-rangin ko
naya libas shab-e-gham badal ke aa.i hai
tire qadam ki bahak hai tiri qaba ki mahak
nasim tere shabistan se chal ke aa.i hai
vafa pe aanch na aati agar tumhi kahte
zaban tak aaj jo ik baat chal ke aa.i hai
saji hui hai sitaron se mai-kade ki faza
ki raat tere tasavvur men Dhal ke aa.i hai
ba-ehtiyat hamari taraf uThi hai nigah
labon pe mauj-e-tabassum sambhal ke aa.i hai
hamari aah hamare hi dil ki aah nahin
na jaane kitne dilon se nikal ke aa.i hai
sahar tak aa to ga.i sham.a ta-ba parvana
magar hararat-e-gham se pighal ke aa.i hai
miri nigah-e-tamanna ka aks ho na ‘shamim’
kisi ke ruḳh pe jo surḳhi machal ke aa.i hai
Leave a Reply