Dane Ke Baad Kuchh Nahin Dam Ke Baad Kuchh Nahin

Shaheen Abbas

daane ke ba.ad kuchh nahin daam ke ba.ad kuchh nahin

sub.h ke ba.ad shaam hai shaam ke ba.ad kuchh nahin

ḳhvab ka aḳhiri ḳhumar aankh men hai kuchh intizar

niind zara sa kaam hai kaam ke ba.ad kuchh nahin

ḳhak-e-ḳharab huun zamin tu mira majra na sun

naqsh ke ba.ad naam tha naam ke ba.ad kuchh nahin

shahr ki had bhi maap li shaam bhi dil pe chhap li

ek charagh aur ek baam ke ba.ad kuchh nahin

vasl gaya to hijr tha hijr gaya to kuchh na tha

ḳhaas ke ba.ad aam hon aam ke ba.ad kuchh nahin

jism ka nashsha pi chuke apni taraf se ji chuke

chaliye ki jaam ulaT chuka jaam ke ba.ad kuchh nahin