Poet
tumhara naam zaban se nikal gaya aḳhir
zamana mere guman se nikal gaya aḳhir
sambhal kar jise rakkha hua tha muddat se
vo tiir teri kaman se nikal gaya aḳhir
tamam apne saval-o-javab bhuul ga.e
hisab-e-sud-o-ziyan se nikal gaya aḳhir
har ek shaḳhs men tujh ko talash karta hua
hujum-e-nukta-varan se nikal gaya aḳhir
jo lazmi tha tire samne ada hona
vo ek lafz bayan se nikal gaya aḳhir
tumhare samne kab tak ḳhirad vafa karti
makin-e-hosh makan se nikal gaya aḳhir
miri talash men had hi ubuur kar Daali
mire liye vo jahan se nikal gaya aḳhir
Leave a Reply