siva hai had se ab ehsas ki girani bhi
giran guzarne lagi un ki mehrbani bhi
kis ehtimam se padhte rahe sahifa-e-zist
chalen ki khatm hui ab to vo kahani bhi
likho to khun-e-jigar se hava ki lahron par
ye dastan anokhi bhi hai purani bhi
kisi tarah se bhi vo gauhar-e-talab na mila
hazar baar lutai hai zindagani bhi
hamin se anjuman-e-ishq mo’tabar thahri
hamin ko saunpi gai gham ki pasbani bhi
ye kya ajab ki vahi bahr-e-nisti men giri
nafs ki mauj men masti bhi thi ravani bhi
shuur o fikr se aage hai chashma-e-takhliq
hatega sang to bahne lagega paani bhi
Leave a Reply