Kabhi Siski Kabhi Aawaza Safar Jari Hai

kabhī siskī kabhī āvāza safar jaarī hai

kisī dīvāne kā dīvāna safar jaarī hai

thak ke baiTheñ to kahīñ haath vo chhoḌvā hī na le

bas isī ḳhauf meñ hī andhā safar jaarī hai

ye jo aage kī taraf paañv nahīñ uThte mire

apne andar kī taraf merā safar jaarī hai

kitnī hī manzileñ pā kar bhī tasallī na huī

mere bal-būte pe qismat kā safar jaarī hai

kuchh mahīne to hameñ jaag ke hī chalnā paḌā

kuchh mahīnoñ se ye ḳhvābīda safar jaarī hai

jis ko bhī chaltā huā dekheñ so chal paḌte haiñ

kyuuñ ‘vaqār’ apnā ye an-dekhā safar jaarī hai

Leave a Comment