shab-e-siyah se niklega mahtab koi
ufuq men dekhte rahiyega roz ḳhvab koi
javab DhunD ke saare jahan se jab lauTe
hamen to kar gaya yak-laḳht la-javab koi
chaman se nikle hain ik phuul toḌ kar ham bhi
lahuluhan se hathon men hai gulab koi
milen to kaise milen jaa.en to kahan jaa.en
ki kar raha hai bahut ham se ijtinab koi
bikherte hue sona zamin men charon taraf
ubhar raha hai samundar se aftab koi
‘mamun’ charon taraf mere ab andhera hai
ubhar ke Duub gaya mujh men aftab koi
Leave a Reply