dastan-e-zindagi likhte magar rahne diya
us ke har kirdar ko bas mo’atabar rahne diya
koi manzil koi mafruza na tha pesh-e-nazar
zer-e-pa ik rah-guzar thi rahguzar rahne diya
dil ke har mausam ne bakhshi daulat-e-ehsas-o-dard
sirf is sarmae ko zad-e-safar rahne diya
saath ik khush-bash lahja mahfilon men le ke aae
dil ki virani ko tanha apne ghar rahne diya
shor karti bhagti duniya men shamil bhi rahe
ek sur maddham sa dil ke saaz par rahne diya
vaqt ke bahte hue dariya pe kashti daal kar
saare andeshon se khud ko be-khabar rahne diya
khud-gharaz thoda sa hona bhi zaruri tha magar
tajrabon se siikh kar bhi ye hunar rahne diya
saari duniya ke liye har shab dua-e-khair ki
zikr apni khvahishon ka mukhtasar rahne diya
kyuun koi dekhe hamare dil ki saari mumlikat
ik jhalak dikhlai hai aur beshtar rahne diya
kaun daman-gir hai aksar ye karta hai saval
kar to saktin thiin bahut kuchh tum magar rahne diya
Leave a Reply