Shadab Anjum
hiqarat ki nazar se dekhta hai har bashar mujh ko
zamana bolta hai tum bhi kah lo dard-e-sar mujh ko
main huun vo sham.a jis ki qadr-o-qimat sirf itni hai
kisi ne taaq par rakkha kisi ne qabr par mujh ko
bharose ki saḌak par bughz ke itne gaḌhe dekhe
ki ab ik shaḳhs bhi lagta nahin hai mo’atabar mujh ko
havaon ne to kashti ka miri ruḳh moḌ hi Daala
ai lahro tum bhi kar lo aa ke ab zer-o-zabar mujh ko
fareb-e-manzil-e-maqsad se vaqif ho gaya huun main
ḳhudara aap rahne dijiye mahv-e-safar mujh ko
ghira huun aaj zulmat men magar ummid hai ‘anjum’
ki mil hi ja.egi kal zindagani ki sahar mujh ko
Leave a Reply