ik guzarish hai bas itna kijiye
jab kabhi fursat ho aaya kijiye
log is ka bhi ghalat matlab na len
ajnabiyyat se na dekha kijiye
ḳhud ko apni aankh se dekha to hai
ab miri ankhon se dekha kijiye
iltija thi ek saada iltija
apni tanha.i men socha kijiye
yaad to hogi vo apni be-ruḳhi
ab miri tasvir dekha kijiye
marham-e-zaḳhm-e-suḳhan ban ja.iye
kuchh mire fan ka mudava kijiye
ishq ko kab yaad thi rasm-e-vafa
husn ka kis munh se shikva kijiye
zulmat-e-gham jab ziyada ho ‘imam’
sham-e-fikr-o-fan jalaya kijiye
Leave a Reply