Ab Ki Holi Mein Raha Be-Kar Rang

ab ki holi men raha be-kar rang

aur hi laaya firaq-e-yar rang

surakh-ru kar de sharab aai bahar

hai khizan se zard ai khummar rang

hont uude sabz khat ankhen siyah

chehre ka surK-o-safed ai yaar rang

ham ko saare gulshan-e-afaq men

bas pasand aae yahi do-char rang

ghair se kheli hai holi yaar ne

Daale mujh par dida-e-khun-bar rang

kis ki holi jashn-e-nau-rozi hai aaj

surkh mai se saqiya dastar rang

hijr-e-janan men thaharta hi nahin

kya hi mere munh se hai bezar rang

kya hai girgit asman ke samne

badle ik ik dam men sau sau baar rang

aati hai o qais laila dasht men

khun-e-pa se jild ab pur-khar rang

dhuup hai par mere roz-e-hijr ka

hai ba-rang-e-saya-e-divar rang

ho gaya kyuun zard ‘nasikh’ kya kahun

hai zamane ka ajab ai yaar rang

Leave a Comment