Poet
mera shikva tiri mahfil men adu karte hain
us pe bhi sabr ham ai arbada-ju karte hain
mashq-e-bedad-o-sitam karte hain gar vo to yahan
ham bhi bedad o sitam sahne ki khu karte hain
jaan hui hai nigah-e-nam pe un ki ashiq
chaak dil tar-e-nazar se jo rafu karte hain
be-sabati chaman-e-dahr ki hai jin pe khuli
havas-e-rang na vo khvahish-e-bu karte hain
aaj shamshir ba-kaf nikle hain vo dekhiye tar
ab-e-shamshir se kis kis ke gulu karte hain
hai rachi jin ke dimaghon men tiri zulf ki bu
ambar o mushk ki kab bu ko vo bu karte hain
mushk o ambar ka unhen naam bhi lena hai nang
yaar ki zulf-e-moambar ko jo bu karte hain
chaak karte hain gareban ko vahshat men kabhi
chak-e-dil men kabhu nakhun ko faru karte hain
dekh sauda-zada-e-ulfat-e-khuban ai ‘aish’
vadi-e-ishq men kya kya tag-o-pu karte hain
Leave a Reply