ik shakl be-irada sar-e-bam aa ga.i
phir zindagi men faisle ki shaam aa ga.i
dasht o makan ke fasle be-rang-o-nur the
ik rang le ke gardish-e-ayyam aa ga.i
vo rahguzar jo aa.i to sar ko saja liya
daman ki ḳhaak aaj mire kaam aa ga.i
phir ik hisar TuuT gaya iḳhtiyar ka
phir ik sada-e-kucha-e-ilzam aa ga.i
ham bolte rahe to rahe lafz sang-e-rah
chup ho ga.e to manzil-e-ilham aa ga.i
‘sabir’ zamin pe ranj bhi us ne utare hain
lekin ye fard-e-jurm mire naam aa ga.i
Leave a Reply