ik dard ki lazzat hi sahi ḳhvahish-e-gham men
ankhen hi na bah jaa.en kahin barish-e-gham men
is ghar ki sajavaT to anokhi hai sada se
dil roz ujaḌta raha ara.ish-e-gham men
itna bhi sukun pahle to hasil hi nahin tha
jitna hai mayassar abhi asa.ish-e-gham men
ab dusri duniya hi sanvar ja.egi shayad
jannat ki tamanna hai bahut kavish-e-gham men
haan ḳhalq bana.egi yahan roz fasane
tum saath zamane ke raho pursish-e-gham men
Leave a Reply