muqabil be-muravvat aa.ina hone nahin deta
koi ab ḳhud se apna samna hone nahin deta
bahut jhuk jhuk ke chalta huun main in baunon ki basti men
ye chhoTa-pan kabhi mujh ko baḌa hone nahin deta
kashakash ye ajab ik ishq ki jaari hai sadiyon se
fida hota huun main aur vo fana hone nahin deta
vahi jaane kahan pahuncha.ega apne asiron ko
pata deta nahin aur lapata hone nahin deta
yahi kah kar mohabbat kijiye to be-gharaz kiije
vo ḳhud ko meri chahat ka sila hone nahin deta
bahut parhez hai us ko mira bimar ho kar bhi
kisi surat mujhe apni dava hone nahin deta
vo rakhta hai mujhe is tarah apni chust bandish men
kabhi mujh ko shikast-e-na-rava hone nahin deta
main kab tak bakriyon ke vaste patte gira.unga
miri laThi ko vo ab azhdaha hone nahin deta
ḳhushi aur na-ḳhushi par ab nahin kuchh iḳhtiyar apna
ḳhafa karta hai mujh ko aur ḳhafa hone nahin deta
Leave a Reply