tu saath ho to lagta hai mahshar hai saath saath
tera vajud jaise samundar hai saath saath
taqsim kijiye na mazahib men fard ko
masjid ke saath dekhiye mandar hai saath saath
markaz to pahle roz se hi mere saath tha
is ishq ke vajud ka mehvar hai saath saath
tanha.i men bhi sach kahun tanha nahin raha
is sha.iri ke sadqe men sha.ir hai saath saath
mera yaqin qad se mire hai buland-tar
gahre samundaron men muqaddar hai saath saath
hadd-e-nigah tak miri qabron ka shahr hai
har ik qadam pe mere mujavar hai saath saath
ye silsila hai saare ka saara yazid ka
nasl-e-yazid aaj bhi ‘safdar’ hai saath saath
Leave a Reply