Ameer Qazalbash
aaj ki raat bhi guzri hai miri kal ki tarah
haath aa.e na sitare tire anchal ki tarah
hadsa koi to guzra hai yaqinan yaaro
ek sannaTa hai mujh men kisi maqtal ki tarah
phir na nikla koi ghar se ki hava phirti thi
sang hathon men uTha.e kisi pagal ki tarah
tu ki dariya hai magar meri tarah pyasa hai
main tere paas chala a.unga badal ki tarah
raat jalti hui ik aisi chita hai jis par
teri yaden hain sulagte hue sandal ki tarah
main huun ik ḳhvab magar jagti ankhon ka ‘amir’
aaj bhi log ganva den na mujhe kal ki tarah
Leave a Reply