sadgi pahchan jis ki ḳhamushi avaz hai
sochiye us a.ine se kyuun koi naraz hai
be-sabab sayon ko apne lambe qad pe naaz hai
ḳhaak men mil ja.enge ye shaam ka aghaz hai
yuun hava lahron pe kuchh tahrir karti hai magar
jhuum kar bahta hai dariya ka yahi andaz hai
dekh kar shahin ko pinjre men patinga kuchh kahe
janta vo bhi hai kis men quvvat-e-parvaz hai
kyuun mughanni ke liye bechain hai tu is qadar
ai dil-e-nadan ki tu to ik shikasta saaz hai
Leave a Reply