poet

Kuchh Munh Se Dene Kah Wo Bahane Se Uth Gaya

kuchh munh se dene kah vo bahane se uth gaya

harf-e-sakhavat aah zamane se uth gaya

hai us ke dekhne ki havas kya ghazab ki aah

jo tund-khu tuk aankh uthane se uth gaya

puchhi jo us se main dil-e-sad-chak ki khabar

uljha ke apni zulf vo shane se uth gaya

kahiyo saba jo hove guzar yaar ki taraf

dil sab taraf se aap ke jaane se uth gaya

paaya jo muztarib mujhe mahfil men to vahin

sharma ke kuchh vo apne-begane se uth gaya

hota tha apne jaane se jis ko qalaq so haae

ghabra ke aaj kya mire aane se uth gaya

hamdam na mujh ko qissa-e-aish-o-tarab suna

muddat se dil kuchh aise fasane se uth gaya

jab tak tu aae aae ki duniya hi se koi

le jaan tere der lagane se uth gaya

‘jurat’ ham is zamin men kahte hain aur sher

har-chand ji sukhan ke badhane se uth gaya

More Poems

Leave a Comment