Ali Jawwad Zaidi
junun se rah-e-ḳhirad men bhi kaam lena tha
har ek ḳhaar se izn-e-ḳhiram lena tha
faraz-e-dar pe daman kisi ka thaam liya
junun-e-shauq ko bhi intiqam lena tha
hazar baar nata.ej se ho ke be-parva
usi ka naam liya jis ka naam lena tha
ilaj-e-tishna-labi sahl tha magar saaqi
jo dast-e-ghair men hai kab vo jaam lena tha
junun ki raah men tadbir-e-sarḳhushi ke liye
bas ek valvala-e-tez-gam lena tha
shikasta laakh thi kashti hazar tha tufan
ḳhayal men koi daman to thaam lena tha
nasim ek ravish tak pahunch ke tham si ga.i
ki na-shagufta kali ka payam lena tha
shab-e-firaq men bhi kuchh diye chamakne lagen
nigah-e-shauq se itna to kaam lena tha
hazar baar tiri bazm men hua mahsus
liya jo ghair ne mujh ko vo jaam lena tha
main ek jur.a-e-masti pe sulh kyuun karta
mujhe to jaam men mah-e-tamam lena tha
ghazab hua ki in ankhon men ashk bhar aa.e
nigah-e-yas se kuchh aur kaam lena tha
kisi ne aag laga.i ho koi mujrim ho
hamen to apne hi sar ittiham lena tha
nigah-e-shoḳh yahi fat.h aur kuchh hoti
jo gir rahe the unhen baḌh ke thaam lena tha
ye bazm-e-ḳhas ka aish-e-do-roza kya hoga
gham-e-avam se aish-e-davam lena tha
Leave a Reply