vo jis ke naam men lazzat bahut hai
usi ke zikr se barakat bahut hai
zara mahfuz raston se guzarna
tumhari shahr men shohrat bahut hai
abhi suraj ne lab khole nahin hain
abhi se dhuup men shiddat bahut hai
mujhe sone ki qimat mat batao
main miTTi huun miri azmat bahut hai
kisi ki yaad men kho.e rahenge
gunah-garon ko ye jannat bahut hai
jinhen masruf rahne ka maraz tha
unhen bhi aj-kal fursat bahut hai
jahan par ḳhushbuen thiin zindagi ki
usi mahfil men ab ghibat bahut hai
kabhi to husn ka sadqa nikalo
tumhare paas ye daulat bahut hai
ghazal ḳhud kah ke paḌhna chahte ho
miyan is kaam men mehnat bahut hai
hava to tham chuki lekin diyon ke
ravayyon men abhi dahshat bahut hai
Leave a Reply