Shoaib Nizam
mil gaya jab vo nagin phir ḳhubi-e-taqdir se
dil ko kya kya vahshaten hain sang ki tasir se
jalta bujhta ek jugnu ki tarah tera ḳhayal
bas yahi nisbat hai apni raat ko tanvir se
phir hava ke haath par bai.at ko dil betab hai
aankh phir raushan hui hai gard ki tahrir se
shab na jaane aankh par kya raaz ifsha kar ga.i
ḳhvab chaknachur ho kar rah ga.e ta.abir se
ḳhud-farebi hai ki is ko agahi ka naam duun
apni qamat napta hai aaj vo shamshir se
is shikasta ghar ka girna yuun laga mujh ko ‘nizam’
TuuT jaa.e ik kaḌi jaise kisi zanjir se
Leave a Reply