Arzoo Lakhnavi
ganva ke dil sa guhar dard-e-sar ḳharid liya
bahut garan tha ye sauda magar ḳharid liya
amin-e-ishq ne dil-e-be-ḳhatar ḳharid liya
ye aa.ina ma-e-a.ina-gar ḳharid liya
ghazab tha ishq ka sauda ki ahl-e-hosh ne bhi
jo kuchh nasib tha sab bech kar ḳharid liya
bhala ho gham ki tunuk-zarfi-e-tabi.at ka
agarche baat ganva di asar ḳharid liya
rah-e-raza men hai ḳhuni-kafan se shan-e-shahid
to jaan bech ke raḳht-e-safar ḳharid liya
jo dil kahe na kahun vo jo tu kahe vo kahun
to kya zamir bhi ai hila-gar ḳharid liya
talash-e-aish men ai ‘arzu’ hai ranj hi ranj
sitam-nasib ye kya dard-e-sar ḳharid liya
Leave a Reply