Jamal Ehsani
teri yaad aur tere dhyan men guzri hai
saari zindagi ek makan men guzri hai
is tarik faza men meri saari umr
diya jalane ke imkan men guzri hai
apne liye jo shaam bacha kar rakkhi thi
vo tujh se ahd-o-paiman men guzri hai
tujh se ukta jaane ki ik saa.at bhi
tere ishq hi ke dauran men guzri hai
divaron ka shauq jahan tha sab ko ‘jamal’
umr miri us ḳhandan men guzri hai
Leave a Reply