dil ke andar ik zara si be-kali hai aaj bhi
jo mire afkar men ras gholti hai aaj bhi
yuun to vo divar ban ke aa gaya hai darmiyan
meri apne aap se kuchh dosti hai aaj bhi
pattharon par chal ke sab ne paanv zaḳhmi kar liye
jabki us ke dar ka rasta maḳhmali hai aaj bhi
ruḳh havaon ka badalna jante hain log jo
bas unhin ke har diye men raushni hai aaj bhi
jin savalon ka nahin hota koi musbat javab
un savalon se ulajhta aadmi hai aaj bhi
sikhta hai yuun to insan har tariqe ki zaban
sab se asan sab se behtar ḳhamushi hai aaj bhi
jis ke chalte main ne DhunDe the ka.i raste na.e
DhunDhti mujh ko vahi avargi hai aaj bhi
kitne Duube kitne ubhre kya ḳhabar un ko ‘farogh’
bah rahi chup-chap yuun hi har nadi hai aaj bhi
Leave a Reply