Qayyum Tahir
ik hara jazira bhi paniyon se aage hai
us ki diid ki saa.at rat-jagon se aage hai
kaun se manazir men us ko DhunDne niklen
vo guman se haT kar hairaton se aage hai
badban ki ankhen ḳhvab kaun sa dekhen
kaun ik kinara sa sahilon se aage hai
aks jhilmilate hain ek sabz qarye ke
jo jale daraḳhton ke jangalon se aage hai
naam kiya likhen us ka sab huruf us ke hain
kya use tarashen vo ḳhvahishon se aage hai
kaun si ḳhalaon men kis ufuq ko jaate ho
jo qadam uThate ho manzilon se aage hai
Leave a Reply