a.ina-e-rangin-e-jigar kuchh bhi nahin kya
kya husn hi sab kuchh hai nazar kuchh bhi nahin kya
chashm-e-ghalat-andaz ke shayan bhi na Thahre
jazb-e-gham-e-pinhan men asar kuchh bhi nahin kya
nazren hain kisi ki ki hai ik atish-e-sayyal
yuun aag lagane men ḳhatar kuchh bhi nahin kya
adna sa ishara bhi hai jis ka mujhe ik hukm
us par miri aahon ka asar kuchh bhi nahin kya
maana mire jalne se na aanch aa.egi tum par
lekin mire jalne men zarar kuchh bhi nahin kya
yuun bhi koi duniya ki nigahon se na gir jaa.e
‘mulla’ ko bura kahne men Dar kuchh bhi nahin kya
Leave a Reply