itne imkan ke ujalon men
zindagi phans ga.i vabalon men
tajziya ḳhud ka jab kiya ham ne
ziist gum ho ga.i savalon men
kuchh nahin e’tibar maston ka
raat din gharq hai piyalon men
aaj bhi vaisi hi vo dikhti hai
kuchh nahin badla itne salon men
ab ḳhayalon men tandurusti hai
aa ga.e jab se tum ḳhayalon men
main abhi sun ke aaya huun qissa
aap ka zikr hai misalon men
Dubne vaale phir na ubhre hain
kitne girdab hain jamalon men
sharm se laal kiya hua chehra
paḌ ga.e gaDDhe surḳh galon men
Leave a Reply