Munib Muzaffarpuri
apni auqat zamane ko batate aa.e
tum jidhar aa.e udhar aag lagate aa.e
ham ko mahfil men ta.alluq ka bharam rakhna tha
dushmanon ko bhi gale apne lagate aa.e
bas yahi un ka karam ham pe bahut bhari hai
jab vo aa.e to karam apna jatate aa.e
ek aahaT bhi Dara deti hai tanha.i men
ḳhvab jab aa.e tire mujh ko Darate aa.e
ḳhud ka ghar phuus ka hai yaad nahin tha shayad
ghar men ham-sayon ke vo aag lagate aa.e
a.ina qad ke barabar ho zaruri to nahin
aisi chahat men vo kyon jaan khapate aa.e
Leave a Reply