kyuun na afsana-e-gham kaif ka unvan Thahre
shiddat-e-dard hi jab dard ka darman Thahre
jis jagah ham sa koi chak-e-gareban Thahre
shauq se aa ke vahan fasl-e-baharan Thahre
us ke daman ki taraf haath baḌha.un kaise
jis ke daman ki mahak sho.alagi-e-jan Thahre
manzilen aati hain aur aa ke guzar jaati hain
dekhiye ja ke kahan qafila-e-jan Thahre
pichhle va.ade jo nahin yaad to kya baat hui
phir koi ahd-e-vafa phir koi paiman Thahre
aap ko dekhun to ho duur miri tishna-labi
aap aa jaa.en to jazbat ka tufan Thahre
shoḳhi-e-dast-e-saba se to koi kuchh na kahe
mere sar tohmat-e-gesu-e-pareshan Thahre
Leave a Reply