Kaha din Ko Bhi Ye Ghar Kis Liye Viran Rahta Hai

Etibar Sajid

kaha din ko bhi ye ghar kis liye viran rahta hai

yahan kya ham sa koi be-sar-o-saman rahta hai

dar-o-divar sannate ki chadar men hain khvabida

bhala aisi jagah zinda koi insan rahta hai

musalsal puchhne par ek chilman se javab aaya

yahan ik dil-shikasta sahab-e-divan rahta hai

jhijak kar main ne puchha kya kabhi bahar nahin aata

javab aaya use khalvat men itminan rahta hai

kaha kya us ke rishta-dar bhi milne nahin aate

javab aaya ye sahra rat-din sunsan rahta hai

kaha koi to hoga us ke dukh-sukh bantne vaala

javab aaya nahin khali ye ghar ye lawn rahta hai

kaha is ghar ke angan men hain kuchh phulon ke paude bhi

javab aaya ki khali phir bhi har gul-dan rahta hai

kaha kya is mohalle men nahin pursan-e-hal us ka

javab aaya khayal us ka mujhe har aan rahta hai

khuda ka shukr hai ham ik faza men saans lete hain

agar milte nahin itna to itminan rahta hai