Saba Viran

sulaiman sar-ba-zanu aur saba viran

saba viran, saba aaseb ka maskan

saba alam ka ambar-e-be-payan!

gayah o sabza o gul se jahan khali

havaen tishna-e-baran,

tuyur is dasht ke minqar-e-zer-e-par

tu surma var gulu insan

sulaiman sar-ba-zanu aur saba viran!

sulaiman sar-ba-zanu tursh-ru gham-gin, pareshan-mu

jahan-giri, jahan-bani faqat tarrara-e-ahu

mohabbat shola-e-paran havas bu-e-gul be-bu

za-raz-e-dahr kam-tar-go!

saba viran ke ab tak is zamin par hain

kisi ayyar ke gharat-garon ke naqsh-e-pa baaqi

saba baqi, na mahru-e-saba baqi!

sulaiman sar-ba-zanu

ab kahan se qasid-e-farkhanda-pai aae?

kahan se, kis subu se kasa-e-piri men mai aae?

deserted Shebal