Poet
nashshe men ji chahta hai bosa-bazi kijiye
itni ruḳhsat dijiye banda-navazi kijiye
chahiye jo kuchh so ho pahle hi sajde men husul
aap ko gar ka.aba-e-dil ka namazi kijiye
jis ne ik jalva ko dekha ji diya parvana-var
is qadar ai sham.a-ruyan husn-sazi kijiye
nardban kahte hain hai bam-e-haqiqat ka majaz
chand roz is vaste ishq-e-majazi kijiye
ḳhvahish-e-raushan-dili gar hove shab se ta-sahar
sham.a-san ‘bedar’ ro ro jan-gudazi kijiye
Leave a Reply