Ye Hadisa Hai Magar Us Taraf Hua Bhi Nahin

ye hādisa hai magar us taraf huā bhī nahīñ

judā huā bhī to us se jo jāntā bhī nahīñ

kabhī to soch tujhe kitnā sochtā hogā

vo ġham-zada jo tirī samt dekhtā bhī nahīñ

ye dil ne ruuTh ke kin mushkiloñ meñ Daal diyā

usī ko chāhnā aur us se bolnā bhī nahīñ

hameñ to niiñd meñ sapnoñ kī bhī manāhī hai

darīche band bhī rakhne haiñ jhāñknā bhī nahīñ

nigah kā ghar se nikalnā thā jurm pahle hī

aur ab ye hukm huā hai ki sochnā bhī nahīñ

Leave a Comment