Abrar Ahmad
koi soche na hamen koi pukara na kare
ham kahin hain ki nahin hain koi charcha na kare
raat afsun hai kahin ka nahin rahne deti
din ko soe na koi raat ko jaaga na kare
ham nikal aae hain ab dhuup men jalne ke liye
koi badal nahin bheje koi saaya na kare
an-ginat ankhon men ham jalte rahe bujhte rahe
ab bhale khvab hamara koi dekha na kare
ham ne ik shahr basa rakkha hai divaron men
kaam jo dil ne kiya chashm-e-tamasha na kare
koi ab ja ke zara dekhe to us mitti ko
aise sairab kiya hai koi dariya na kare
go faramoshi ki takmil hua chahti hai
phir bhi kah do ki hamen yaad vo aaya na kare
ham use ranj-e-tamanna se to bhar sakte hain
aur ye dil hai ki ab koi taqaza na kare
vaar karna hai agar ham pe to vo khul kar aae
aur bhule se bhi ye kaam vo tanha na kare
Leave a Reply