Haidar Ali Aatish
aisi vahshat nahin dil ko ki sambhal jaunga
surat-e-pairahan-e-tang nikal jaunga
vo nahin huun ki rukhai se jo tal jaunga
aaj jaata tha to zid se tiri kal jaunga
sham-e-hijran kisi surat se nahin hoti subh
munh chhupa kar main andhere men nikal jaunga
khinch kar tegh kamar se kise dikhlate ho
naf-e-maashuq nahin huun jo main tal jaunga
shab-e-hijr apni siyahi kise dikhlati hai
kuchh main ladka to nahin huun ki dahal jaunga
kucha-e-yar ka sauda hai mire sar ke saath
paanv thak thak ke hon har-chand ki shal jaunga
zabt-e-betabi-e-dil ki nahin taqat baaqi
koh-e-sabr ab ye sada deta hai tal jaunga
tal-e-bad ke asar se ye yaqin hai mujh ko
teri hasrat hi men ai husn-e-amal jaunga
chaar din ziist ke guzrenge taassuf men mujhe
hal-e-dil par kaf-e-afsos main mal jaunga
shoala-ruyon ko na dikhlao mujhe ai ankho
mom se narm mira dil hai pighal jaunga
hal-e-piri kise maalum javani men tha
kya samajhta tha main do din men badal jaunga
vahi divangi meri hai bahar aane do
dekh kar ladkon ki surat ko bahal jaunga
sher dhalte hain miri fikr se aaj ai ‘atish’
mar ke kal gor ke sanche men main dhal jaunga
Leave a Reply