kabhi nilgun asman ke tale
sabz sahil pe milne ka vaada hua tha
samundar kisi khvab sa khushnuma tha
samundar ke pahlu men
shahr-e-dil-afroz ka hamhama tha
ye shahr aaj ashkon men duuba hua hai
yahan se vahan tak
har ik rahguzar par
ik aaseb ka samna hai
nigahon ke aage dhuan hai
samundar kahan hai
samundar ke sahil pe milne ka vaada hua tha
koi aaj bhi us bulave ki ummid men
khud se rutha hua hai
koi be-qarari ke sahil pe
ankhen bichhae khada hai
koi ranj odhe hue so raha hai
koi khauf taane hue jagta hai
koi be-karan pyaas men dubta hai
koi aas ke paniyon ko
abas jhagta hai
ajab us zamin ki faza hai
ajab aaj rang-e-falak hai
samundar ki janib se aati hava men
lahu ki mahak hai
Leave a Reply