jigar ko khuun kiye dil ko be-qarar abhi
bhatak rahe hain tire ishq men hazar abhi
isi liye to ye duniya dhuli dhuli si lage
tire firaq men roe hain zar-zar abhi
ada-e-khar se gulshan ki badh gai zinat
agarche phulon ke daman hain taar taar abhi
siyah-bakht fazaon men dil hua bad-zan
tiri zaban ke tevar hain ab-dar abhi
abhi na niklega hasil hamari baton ka
tumhare sar pe hai saaya koi savar abhi
ye dekhte hain ki kal rang-e-sub.h kya hoga
ki aftab ka ‘alam’ hai intizar abhi
Leave a Reply