ḳhadd-o-ḳhal se ḳhali hai
ye tasvir to ja.ali hai
kahte hain marg-e-mufajat
hukm-e-janab-e-ali hai
lashkar-e-is.hal-zada ki
main ne kaman sambhali hai
duniya ki avaz suno
ek hi haath ki taali hai
har ik insan ke andar
baiTha ek mavali hai
amla mo.attal hai dil ka
jaari sa.i-e-bahali hai
qimat alag hai ḳhaslat ek
ye gandum vo shali hai
sher ki jast ko kaafi bas
mast hiran ki jugali hai
mat phaTko mujh dil ke paas
ye darvesh jalali hai
‘shafaq’! ab apne baare men
kya afvah uḌa li hai
Leave a Reply